Конда́к 1

Избра́нному игу́мену оби́тели О́птинския, ста́рческия чреды́ прее́мнику, похва́льная прино́сим пе́ния, ты́ же о́тче богому́дре, покры́й на́с от бе́д находя́щих, да вси́ с любо́вию зове́м ти́:

Ра́дуйся, Исаа́кие, па́стырю монахолюби́вый.

И́кос 1

С воспита́нием благоче́стие прия́л еси́, о́тче, вскормле́н бы́л еси́ моли́твою церко́вною от пеле́н ма́терних, те́мже я́ко зре́лый пло́д прине́слся еси́ Христу́. Сего́ ра́ди воспева́ем ти́ си́це:

Ра́дуйся, доброде́тели непоколеби́мое основа́ние;

ра́дуйся, еди́ное на потре́бу взыска́ние.

Ра́дуйся, высото́ нра́ва боголюби́ваго;

ра́дуйся, глубино́ се́рдца боговмести́маго.

Ра́дуйся, я́ко еси́ гра́да Ку́рска украше́ние;

ра́дуйся, я́ко еси́ роди́телем твои́м утеше́ние.

Ра́дуйся, кро́тости ти́хий о́бразе;

ра́дуйся, скро́мности све́тлый зра́че.

Ра́дуйся, и́мже чистота́ душе́вная просиява́ется;

ра́дуйся, и́мже простота́ серде́чная благохва́лится.

Ра́дуйся, Исаа́кие, па́стырю монахолюби́вый.

Конда́к 2

А́ще и свя́зан бы́л еси́ у́зами слу́жбы роди́тельския, оба́че со тща́нием прите́кл еси́ к богоно́сному ста́рцу Льву́, и́же предрече́ тебе́ в мона́шеское бы́ти вчине́нну сосло́вие, ты́ же, уве́дев сие́ благода́рно возопи́л еси́ Бо́гу: Аллилу́иа.

И́кос 2

А́нгельскую жи́знь избра́ти жела́я, житие́ мирско́е оста́вил еси́ богому́дре и в О́птину пу́стынь прите́кл еси́, влеко́м благода́тию богоно́сных ста́рцев. Сего́ ра́ди воспису́ем тебе́ похва́льная:

Ра́дуйся, сете́й мирски́х разруше́ние;

ра́дуйся, в во́лю Бо́жию уловле́ние.

Ра́дуйся, Льва́ богому́драго пте́нче богокры́лый;

ра́дуйся, Мака́рия смире́ннаго орле́ превы́спренный.

Ра́дуйся, я́ко к лу́чшему просте́рлся еси́ жела́нию;

ра́дуйся, я́ко оста́вил еси́ мирско́е мудрова́ние.

Ра́дуйся, послу́шниче святы́х ста́рцев;

ра́дуйся, побо́рниче святы́х нра́вов.

Ра́дуйся, насажде́ние доброде́телей;

ра́дуйся, процвете́ние благоче́стия.

Ра́дуйся, Исаа́кие, па́стырю монахолюби́вый.

Конда́к 3

Ко ста́рчестей му́дрости прите́кл еси́, я́ко ко исто́чнику животеку́щему, и́же от се́рдца богому́драго Мака́рия источи́ся, и́мже и наста́влен бы́л еси́, ка́ко в мона́шестем чи́не жи́ти подоба́ет, благода́рне Бо́гу о се́м взыва́я: Аллилу́иа.

И́кос 3

Иску́с проше́д послуша́ний многоразли́чных, о́тче Исаа́кие, хле́бы рука́ма свои́ма испека́я и про́чее вся́ приле́жно исполня́я, в ме́ру му́жа во́зраста дости́гл еси́ соверше́ннаго. Сего́ ра́ди похвала́ми тя́ венча́ем си́ми:

Ра́дуйся, искуше́ний преодоле́ние;

ра́дуйся, в долготерпе́нии укрепле́ние.

Ра́дуйся, земле́, жа́ждущая наставле́ний;

ра́дуйся, исто́чниче сле́зных тече́ний.

Ра́дуйся, хлебопе́чный тру́жениче неусы́пный;

ра́дуйся, в пещи́ мно́гих скорбе́й неопале́нный.

Ра́дуйся, сосу́де, вмеща́яй оте́ческую прему́дрость;

ра́дуйся, подви́жниче превозмога́яй вся́кую тру́дность.

Ра́дуйся, послуша́ния неосла́бное хране́ние;

ра́дуйся, чистосерде́чное по́мыслов испове́дание.

Ра́дуйся, Исаа́кие, па́стырю монахолюби́вый.

Конда́к 4

Ю́ношески по ле́ствице доброде́телей восте́кл еси́ и я́ко мусики́йский орга́н соста́вил еси́ в души́ твое́й созву́чие все́х доброде́телей, сладкогла́сно Бо́гу взыва́я: Аллилу́иа.

И́кос 4

Хвалу́ немо́лчную в це́ркви приноси́л еси́, о́тче Исаа́кие, Бо́гу служа́ прия́тным гла́сом, лико́м А́нгельским подража́я. Сего́ ра́ди воспева́ем тебе́ похва́льная:

Ра́дуйся, одушевле́нный псалти́рю;

ра́дуйся, святовеща́нная кра́сная ли́ро.

Ра́дуйся, А́нгельскому пе́нию ревни́телю;

ра́дуйся, и́ноческому ликостоя́нию учи́телю.

Ра́дуйся, многостру́нная гу́сле моли́твы;

ра́дуйся, сладкозву́чная це́ркве цевни́це.

Ра́дуйся, богогла́сный орга́не ве́дения;

ра́дуйся, созву́чие все́х доброде́телей.

Ра́дуйся, свире́ле па́стырских поуче́ний;

ра́дуйся, трубо́ пра́здничных бде́ний.

Ра́дуйся, Исаа́кие, па́стырю монахолюби́вый.

Конда́к 5

В са́н свяще́ннический избра́н бы́л еси́, о́тче Исаа́кие, от среды́ многочи́сленнаго бра́тства я́ко непоро́чный а́гнец, Бо́гу безкро́вную же́ртву приноси́ти и слове́сным служе́нием при́сно взыва́ти: Аллилу́иа.

И́кос 5

А́ще и прия́л еси́ свяще́нническое служе́ние, но труды́ и́ноческия не оста́вил еси́, простира́яся к вя́щшему соверше́нству, в смире́нии возраста́я от си́лы в си́лу. Сего́ ра́ди похваля́ем тя́ си́це:

Ра́дуйся, освяще́нный це́ркве сто́лпе;

ра́дуйся, канди́ла пра́здничнаго све́те.

Ра́дуйся, олтаря́ Госпо́дня благогове́йный служи́телю;

ра́дуйся, безкро́вныя же́ртвы ангелоле́пный жри́телю.

Ра́дуйся, па́стырскаго иску́сства худо́жниче;

ра́дуйся, священномона́шескаго служе́ния подви́жниче.

Ра́дуйся, очисти́лище нра́вов бра́тии;

ра́дуйся, дерзнове́нный о все́х предста́телю.

Ра́дуйся, и́мже благоче́стие возвыша́ется;

ра́дуйся, и́мже благове́рие утвержда́ется.

Ра́дуйся, Исаа́кие, па́стырю монахолюби́вый.

Конда́к 6

Любо́вь ко все́м бра́тиям стяжа́л еси́, о́тче Исаа́кие, отону́дуже ста́рцем Мака́рием во игу́мены предъизбра́н быва́еши. Мы́ же любве́ не иму́щии ку́ю досто́йную похвалу́ ти́ принести́ возмо́жем, оба́че к Любве́ исто́чнику припа́дающе взыва́ем: Аллилу́иа.

И́кос 6

Ева́нгельское, о́тче, смиренному́дрие стяжа́л еси́, про́ст бы́л еси́ нра́вом я́ко го́лубь и му́др я́ко учени́к Христо́в, те́мже ти́ зове́м:

Ра́дуйся, простоты́ боже́ственный да́ре;

ра́дуйся, чистоты́ благово́нный цве́те.

Ра́дуйся, му́дрости ста́рческия че́стность;

ра́дуйся, моли́твенных созерца́ний све́тлость.

Ра́дуйся, я́ко Христу́ после́довал еси́ самоотверже́нием;

ра́дуйся, я́ко подъя́л еси́ кре́ст игу́менскаго служе́ния.

Ра́дуйся, Христо́вы добро́ты о́бразе;

ра́дуйся, Ева́нгельския лозы́ гро́зде.

Ра́дуйся, го́лубе простоду́шный;

ра́дуйся, игу́мене благоу́мный.

Ра́дуйся, Исаа́кие, па́стырю монахолюби́вый.

Конда́к 7

Безмо́лвие сочета́л еси́ со общежи́тием, монасты́рской бра́тии па́стырь му́дрый яви́лся еси́ и ски́тских отце́в бы́л еси́ покрови́тель, вся́ му́дре упра́вил еси́, е́же еди́нем се́рдцем и еди́неми усты́ пе́ти Бо́гу: Аллилу́иа.

И́кос 7

На па́жити уче́ний оте́ческих упа́сл еси́ ста́до твое́, о́тче Исаа́кие, зла́ком любому́дрия пита́я ча́д твои́х и водо́ю напоя́я умиле́ния. Сего́ ра́ди похва́льная прино́сим тебе́ пе́ние:

Ра́дуйся, кла́дезе оте́ческих уче́ний;

ра́дуйся, исто́чниче сле́зных утеше́ний.

Ра́дуйся, ни́во, гобзу́ющая мона́шеския кла́сы;

ра́дуйся, са́де, израща́яй плодонося́щия души́.

Ра́дуйся, я́ко бразды́ серде́чныя ороси́л еси́ водо́ю покая́ния;

ра́дуйся, я́ко искорени́л еси́ те́рния заблужде́ния ра́лом преда́ния.

Ра́дуйся, бра́тския любве́ сою́зе;

ра́дуйся, преподо́бия све́тлый изумру́де.

Ра́дуйся, и́мже оби́тель О́птинская благосозида́ется;

ра́дуйся, и́мже ски́т Предте́чев благовосхваля́ется.

Ра́дуйся, Исаа́кие, па́стырю монахолюби́вый.

Конда́к 8

О́птинскаго ста́рчества яви́лся еси́ прие́мник, о́тче Исаа́кие, по заве́том отце́в твои́х благоче́стно живы́й, те́мже благода́ть и сла́ву унасле́довал еси́, сыноле́пно взыва́я Бо́гу отце́в твои́х: Аллилу́иа.

И́кос 8

Единому́дренно пожи́л еси́ со ста́рцы твои́ми и продолжа́тель де́л и́х яви́лся еси́; кни́г изда́тельство и оби́тели благоустрое́ние, о душа́х же благопопече́ние, вся́ сия́ со тща́нием испра́вил еси́. Мы́ же за таково́е твое́ усе́рдие приноша́ем тебе́ благодаре́ния:

Ра́дуйся, единомы́слия ве́нче златы́й;

ра́дуйся, ста́рцев О́птинских ка́меню честны́й.

Ра́дуйся, перга́менте испи́саный кра́сными черни́лами подви́жничества;

ра́дуйся, скрижа́ле начерта́нная по́стническими уста́вы и́ночества.

Ра́дуйся, книгополо́жницы монасты́рския умноже́ние;

ра́дуйся, сердобо́льное о все́й бра́тии попече́ние.

Ра́дуйся, зо́дчества и́ноческаго зижди́телю;

ра́дуйся, жа́твы Госпо́дния жа́телю.

Ра́дуйся, заве́тов оте́ческих ве́рный блюсти́телю;

ра́дуйся, неусы́пный преда́ния храни́телю.

Ра́дуйся, Исаа́кие, па́стырю монахолюби́вый.

Конда́к 9

Не оста́вил еси́ без попече́ния оби́тель Шаморди́нскую, о́тче Исаа́кие, егда́ ко Го́споду преста́вися богому́дрый основа́тель ея́, но де́лы утверди́л еси́ ю́ и окормле́нием снабди́л еси́ се́стры ея́, Бо́гу благода́рно зову́щия: Аллилу́иа.

И́кос 9

Еле́ем твоего́ милосе́рдия ни́щия снабди́л еси́, о́тче Исаа́кие, са́м сы́й ничто́же име́я, от сокро́вищь ми́лости Боже́ственныя вы́ну богатя́ся. Сего́ ра́ди лю́ди бе́дствующии во отра́ду тобо́ю приведе́ннии си́це тебе́ поя́ху:

Ра́дуйся, сокро́вищнице непреходя́щих бла́г;

ра́дуйся, неусы́пный стра́же духо́вных ча́д.

Ра́дуйся, о ча́дех Амвро́сиевых благопопече́ние;

ра́дуйся, Ша́мординския оби́тели благоустрое́ние.

Ра́дуйся, щедро́т Боже́ственных воспева́ние;

ра́дуйся, ми́лостыни ще́дрое раздая́ние.

Ра́дуйся, вдо́в и сиро́т вспоможе́ние;

ра́дуйся, ни́щих серде́ц обогаще́ние.

Ра́дуйся, я́ко тобо́ю бога́тии нищелю́бствуют;

ра́дуйся, я́ко тобо́ю убо́зии боголю́бствуют.

Ра́дуйся, Исаа́кие, па́стырю монахолюби́вый.

Конда́к 10

Слу́жбе Бо́жией зело́ прилежа́л еси́, о́тче Исаа́кие, Боже́ственную литурги́ю вы́ну чи́нно и со тре́петом соверша́я, и всю́ бра́тию к богослуже́нию приле́жно привлека́л еси́, единоду́шно я́ко же А́нгели на не́бе вопи́ти Бо́гу: Аллилу́иа.

И́кос 10

У́м соблю́л еси́ чи́ст посреде́ попече́ний жите́йских, у́мным худо́жеством све́тлость о́браза Бо́жия в себе́ начерта́в и яви́л еси́ благоле́пие подо́бия. Сего́ ра́ди у́мныя тебе́ прино́сим венцы́:

Ра́дуйся, в серде́чней кле́ти ума́ водруже́ние;

ра́дуйся, чи́стыя моли́твы у́мное восхожде́ние.

Ра́дуйся, А́нгельскому де́ланию подража́яй;

ра́дуйся, жезло́м моли́твы бесо́в поража́яй.

Ра́дуйся, церко́внаго богослуже́ния при́сный рачи́телю;

ра́дуйся, сладкогла́снаго пе́ния преизря́дный ревни́телю.

Ра́дуйся, семисве́тлое души́ просвеще́ние;

ра́дуйся, благово́нное кади́ло богоугожде́ния.

Ра́дуйся, и́мже к слу́жбе Бо́жией привлека́емся;

ра́дуйся, и́мже от де́лания к ве́дению простира́емся.

Ра́дуйся, Исаа́кие, па́стырю монахолюби́вый.

Конда́к 11

Сла́ву смиренному́дрия стяжа́л еси́, о́тче Исаа́кие, ю́же я́ко вене́ц от все́х доброде́телей спле́л еси́ себе́, те́мже мудреце́м ве́ка сего́ показа́л еси́ и́х несмы́сленное зна́ние, Бо́гу умудри́вшему тя́ при́сно взыва́я: Аллилу́иа.

И́кос 11

Любо́вь безме́рную стяжа́л еси́, о́тче Исаа́кие, я́ко вся́к к тебе́ притека́яй николи́же неуте́шен оты́де от тебе́, сего́ ра́ди бра́тия не то́кмо отца́, но и ста́рца ста́рцев тя́ именова́ша, зову́ще тебе́ сия́:

Ра́дуйся, благослове́ний ще́дрое раздая́ние;

ра́дуйся, на ло́не оте́ческом ча́д упокое́ние.

Ра́дуйся, любве́ необъя́тная пучи́но;

ра́дуйся, добро́ты неволну́ющееся мо́ре.

Ра́дуйся, бе́здно бла́гости и Бо́гу подража́ние;

ра́дуйся, ми́лование па́дших и грехо́в проще́ние.

Ра́дуйся, оте́ческая красото́ и ста́рцев благоле́пие;

ра́дуйся, любому́дрия простото́ и чистоты́ селе́ние.

Ра́дуйся, я́ко тобо́ю мудрецы́ ве́ка сего́ посрамля́ются;

ра́дуйся, я́ко тобо́ю простецы́ све́том богоразу́мия исполня́ются.

Ра́дуйся, Исаа́кие, па́стырю монахолюби́вый.

Конда́к 12

О́птину пу́стынь украси́л еси́ твои́м житие́м, о́тче Исаа́кие, умерщвле́нием страсте́й жи́знь безконе́чную прия́л еси́ и безсме́ртием я́ко кри́н в до́му Бо́жием прицве́л еси́, мо́щи твоя́ в Каза́нстей це́ркви я́ко са́д нетле́ния оста́вил еси́, чудеса́ произраща́ющия с ве́рою к ни́м притека́ющим и пою́щим Бо́гу: Аллилу́иа.

И́кос 12

Всели́лся еси́, о́тче преподо́бне, со ста́рцы твои́ми в Ра́йския ку́щи, иде́же наслажда́ешися плода́ми несконча́емыя ра́дости, но не забу́ди ча́д твои́х, во юдо́ли плаче́вной су́щих, с ве́рою прося́щих твоея́ по́мощи и вопию́щих тебе́ такова́я:

Ра́дуйся, хра́ма Бо́жия благоукраше́ние;

ра́дуйся, ски́нии мы́сленныя благосоверше́ние.

Ра́дуйся, святы́ня лежа́щая под спу́дом;

ра́дуйся, ра́ка украше́нная незри́мым чу́дом.

Ра́дуйся, безсме́ртный хода́таю пред Престо́лом Всевы́шняго;

ра́дуйся, безотка́зный помо́щниче утесне́ннаго и ни́щаго.

Ра́дуйся, А́нгельским чино́м сликовствова́ние;

ра́дуйся, мона́шеским лико́м чиннособра́ние.

Ра́дуйся, я́ко тобо́ю нему́дрии умудря́ются;

ра́дуйся, я́ко тобо́ю простецы́ похваля́ются.

Ра́дуйся, Исаа́кие, па́стырю монахолюби́вый.

Конда́к 13

О, богому́дре о́тче Исаа́кие, простоты́ Ева́нгельския о́бразе, при́зри ны́не на ча́д твои́х, в стра́стнем плене́нии су́щих, и разреши́ ны́ твое́ю моли́твою от соу́за грехо́внаго, да в простоте́ Ева́нгельстей пожи́вше, тебе́ подража́юще, дости́гнем иде́же ты́ воспева́еши: Аллилу́иа.

[Се́й конда́к глаго́лется три́жды.]
[Далее повторяем 1‑е икос и кондак:]

И́кос 1

С воспита́нием благоче́стие прия́л еси́, о́тче, вскормле́н бы́л еси́ моли́твою церко́вною от пеле́н ма́терних, те́мже я́ко зре́лый пло́д прине́слся еси́ Христу́. Сего́ ра́ди воспева́ем ти́ си́це:

Ра́дуйся, доброде́тели непоколеби́мое основа́ние;

ра́дуйся, еди́ное на потре́бу взыска́ние.

Ра́дуйся, высото́ нра́ва боголюби́ваго;

ра́дуйся, глубино́ се́рдца боговмести́маго.

Ра́дуйся, я́ко еси́ гра́да Ку́рска украше́ние;

ра́дуйся, я́ко еси́ роди́телем твои́м утеше́ние.

Ра́дуйся, кро́тости ти́хий о́бразе;

ра́дуйся, скро́мности све́тлый зра́че.

Ра́дуйся, и́мже чистота́ душе́вная просиява́ется;

ра́дуйся, и́мже простота́ серде́чная благохва́лится.

Ра́дуйся, Исаа́кие, па́стырю монахолюби́вый.

Конда́к 1

Избра́нному игу́мену оби́тели О́птинския, ста́рческия чреды́ прее́мнику, похва́льная прино́сим пе́ния, ты́ же о́тче богому́дре, покры́й на́с от бе́д находя́щих, да вси́ с любо́вию зове́м ти́:

Ра́дуйся, Исаа́кие, па́стырю монахолюби́вый.

Моли́тва

О, преподо́бне о́тче наш Исаа́кие, оби́тели О́птинския изря́дный упра́вителю. Ты по заве́том отце́в твои́х ве́рно ходи́л еси́ и ста́рчества О́птинскаго был еси́ я́ко благоцвету́щая розга́. Под твои́м окормле́нием мно́гия ду́ши на стези́ спасе́ния наста́влени бы́ша и соверше́нства достиго́ша, я́ко о́браз был еси́ па́стве твое́й и в дея́нии преуспе́л еси́ и в безмо́лвии иску́сен яви́лся еси́. Сего́ ра́ди к тебе́ припа́дающе мо́лимся: возста́ви нас, в нераде́нии живу́щих и о за́поведех Госпо́дних небрегу́щих и в преда́нии оте́честем косня́щих, отону́дуже и пра́ведный гнев Бо́жий на ся дви́жим и Ма́терь Све́та свои́м житие́м печа́лим. Но бу́ди нам ре́вностный блюсти́тель к тебе́ с ве́рою притека́ющим и па́лицею моли́тв твои́х выну упра́ви наш путь от собла́зн жите́йских и страсте́й растле́нных. Незаблу́дным путе́м оте́ческаго преда́ния научи́ ны ходи́ти и за́поведи Госпо́дни приле́жно соверша́ти, да твои́м хода́тайством у Престо́ла Всевы́шняго ми́лость обря́щем и в конце́ ше́ствия на́шего земна́го спасе́ние получи́м, благода́тию и щедро́тами Единоро́днаго Сына О́тчаго Го́спода на́шего Иису́са Христа́, Ему́же честь и держа́ва подоба́ет со Отце́м и Святы́м Ду́хом во ве́ки. Ами́нь.